Эрхэм хүүхэд багачууд, сурагч оюутан, багш сурган хүмүүжүүлэгч, эцэг, эхчүүд Та бүхэнд хичээлийн шинэ жилийн мэндийг дэвшүүлье!

Энэ хичээлийн жилд ерөнхий боловсролын 4 сургуульд 2838 хүүхэд дэвшин суралцсанаас нэгдүгээр ангид 259 хүүхэд, сургуулийн өмнөх боловсролын 6 байгууллагад 898 хүүхэд дэвшин суралцаж, үүнээс 2 настай 252 хүүхэд шинээр элсэн орлоо.

Бид 2021-2024 онд багш, сурагчдын ая тухтай орчинд ажиллаж, суралцах нөхцлийг бүрдүүлэх зорилго тавьж ажилласны үр дүнд:

Хүүхдийн 4 дүгээр цэцэрлэгийн барилгын өргөтгөл ашиглалтад орж, цэцэрлэгийн хүүхдийн хамран сургалт 98 хувьд хүрлээ.

Ерөнхий боловсролын Орхон сургууль, 2 дугаар сургуулийн сурагчдыг биеийн тамир, спортоор хичээллэх, бие бялдрын боловсрол олгох орчин нөхцөлийг хангасан СПОРТ ЗАЛТАЙ болголоо.

Ерөнхий боловсролын 2 дугаар сургуулийг 100 хүүхдийн дотуур байртай болгож, хүүхэд хамгаалалд ахиц гаргалаа. Мөн ерөнхий боловсролын Орхон сургуулийн дотуур байранд засвар хийж, тохижилтыг сайжрууллаа.

Ерөнхий боловсролын 4 сургууль, 5 цэцэрлэг, 2 дотуур байр болон сумын төвийн нийтийн эзэмшлийн зам талбайг бүрэн КАМЕРЖУУЛЛАА.

Хүүхдийн 5 цэцэрлэгийн гадна талбай болон 23 бүлгийг хүүхдийн нас сэтгэхүйн онцлогт тохирсон ТОГЛООМ, ХЭРЭГЛЭГДЭХҮҮНЭЭР хангалаа.

Ерөнхий боловсролын БҮХ БАГШ НАРТ комьпютер олгож, ажиллах нөхцлийг сайжрууллаа.

Мөн ерөнхий боловсролын Орхон сургуулийн 320 хүүхдийн хичээлийн байрны өргөлтгөл, Хүүхэд залуучуудын төвийн барилгын ажил эхлээд байна.

Та бүхэнд хичээлийн шинэ жилийн мэндийг дахин дэвшүүлж, эрдмийн их үйлсэд нь амжилт хүсье!