Мөн өнгөрөгч 3 сард ЭМЯ-ны хөрөнгө оруулалтаар Ангиографи буюу судсан дотуурх оношилгоо, эмчилгээний төхөөрөмжийг суурилуулж байсан бол энэ удаа 200 сая төгрөгийн өртөг бүхий бөөр, шээсний доод замын дурангийн мэс заслын иж бүрэн багажийг суурилууллаа.

Дээрх арга хэмжээнд Эрүүл мэндийн сайд С.Энхболд оролцож, БОЭТ-д нэвтрүүлсэн тоног төхөөрөмжийн байдалтай танилцан тулгамдаж буй асуудал, салбарынхаа цаашдын зорилтын талаар санал солилцсон юм.

2021 онд эрүүл мэндийн салбарт улсын төсвөөс 230 тэрбум төгрөгийн тодотголыг хийсэн бөгөөд үүнээс 110 тэрбум төгрөгийг зөвхөн үзлэг оношилгоонд шаардлагатай тоног төхөөрөмж худалдан авахад зориулсан. Үүний үр дүнд хөдөө орон нутгийн нэгдсэн эмнэлгүүдийг чадавхижуулахад онцгой анхаарч байна.

Өвөрхангай аймгийн эрүүл мэндийн салбарт 2021 онд улс, орон нутгийн төсөв, төсөл хөтөлбөр, зээл тусламжийн хүрээнд нийт 8.9 тэрбум төгрөгийн хөрөнгө оруулалт хийгдсэн бол 2022 онд улсын төсвийн 17.3 тэрбум төгрөгийн хөрөнгө оруулалтын ажил хийгдэж байгаа юм.