ДИВААЖИНГИЙН ЦЭЦЭРЛЭГТ ХҮРЭЭЛЭН

Эрдэнэ толгой багийн иргэн Ж.Ганбаатар 2001 оноос хашааны тохижилт, ногоон байгууламжаа сайжруулж гацуур, хуш, шинэс, нарс, хус, улиас, агч, хайлаас, бургас, бүйлс, гүйлс, улиангар, голт бор, шар хуайс, нохойн хошуу, жигд, долоогоно, тэхийн шээг зэрэг мод бут тарьж ургуулсан. Хиймэл нуур 3-ыг байгуулж, нугас, галуу, цацагт хяруул, тагтааг нутагшуулаад 18 жил болж байна. Их Монгол улсын нийслэл Хархорум хот байгуулагдсаны 800 жилийн ойд зориулж Далай 4 хааныг залж, Монголын нууц товчоо, Их засаг хуульд зориулж чулуугаар гэрэлт самбар бүтээжээ. Иргэдийн оролцоотой 108 суварганы бодь мод буюу агч модыг тарьж, мод тарих сонирхолтой иргэд болон байгууллагуудад хайлаас, гацуур, нарс, шинэс модны үрсэлгээ өгч зөвлөж тусалж байна.

Мөн Соёмбо үсэг зохиогдсоны 333 жил, Үндэсний эрх чөлөө, тусгаар тогтнолоо сэргээсний 108 жилийн ойг тохиолдуулан Хархорин сумын Ноёхон толгойд орших Их Соёмбыг Ж. Ганбаатар, О.Лхамсүрэн нар санаачлан зохион байгуулж, орон нутгийн удирдлагуудын дэмжлэгтэй, нутгийн иргэдийн оролцоотой сэргээн засварласнаа 2019 оны 11 дүгээр сард хүлээлгэн өгч байжээ. Цаашид ЗДТГ, Ерөнхий боловсролын сургууль, цэцэрлэгийн багш нартай хамтран хүүхэд багачуудад экологийн боловсрол олгох хүсэл өвөрлөж байна.

ЭКО ХАРХОРИН төслийн хүрээнд орчноо сайжруулж, ногоон байгууламжаа нэмэгдүүлж байгаа албан байгууллага, айл өрх, иргэдийн талаар цуврал мэдээллийг хүргэж байна.

ХАШААНДАА САЙХАН АМЬДАРЪЯ.

Засаг даргын Тамгын газар .